- Connie Tsum
百萬拳賽過磅儀式︱鍾培生爆阿媽為林作守齋唸經
麥明詩舊愛林作和鍾培生的百萬拳賽今日（17日）舉行過磅儀式，林作卻遲到30分鐘，令全部人呆等，而林作女友裕美有到場支持。齊人後逐個拳手過磅，拳手兼藝人張致恒重達73.5kg（161.7磅），超重3.5kg（7.7磅），有人拋出減磅衫寸他肥，大會表示超重可能需要調整裝備。
而林作重鍾培生17磅之多，由於林作沒有磅數限制，過磅時狀甚輕挑，學鍾培生豎起手指動作，舉起兩隻食指。之後兩人對望影合照face off，當2人被要求再行近點時，林作笑說：「錫好冇？」現場起哄說好，但鍾培生突然獅吼大叫一聲，令全場頓時靜晒。林作表示好輕鬆，自認「大賽型」選手一出世就準備好。而鍾培生就感謝大家關注了拳賽半年，好感恩香港人做到國際級水平賽事。
林作解釋並冇遲到，是工作人員表示未準備好，他才落樓買早餐食，對於鍾培生獅吼有否被嚇親？他說：「唔知發生乜事，通常啲人唱K飲醉先會咁，幾新鮮。」至於對手開賽前撩加碼100萬KO他，林作以律師口脗指對手在社交網發文具法律效力，故林作反邀約若對手不能打低他，便要跟林作的教練打，林作覺得鍾培生之後的留言，是不接受他反邀約，所以拳賽最終規條沒有變過。
林作揶揄鍾生飄忽不定，經常前言不對後語，改規例令他部署有影響，包括不能戴頭套及休息時間縮短：「如果佢做證人就死火。」對於明天賽事不能戴頭套會增加危險性？林作自認識鐵頭功，更講有味笑言，說全身的頭都大size，裕美可以作證：「拳賽唔可以用頭鎚，但互相對打會撞到。（有冇信心贏？）非常有信心，可以收錢同女友食飯。」
另邊廂的鍾培生亦自信十足，自言精神和體能上具滿分，他解釋撩加碼100萬，是希望打低林作慳回30萬出場費，但否認不接受林作反邀請：「我接受，我接受同佢教練打。（林作話你不接受？）對質呀！」並強調沒有改規例，故2人可謂各執一詞。他說希望第1、2圈就打低林作：「佢企得耐，受傷會好犀利。」又說現在是自己最好狀態，父母明天會來看賽事，指媽媽擔心得為林作守齋唸經2個星期，自言不會留手，並說：「佢可以唔打。」